O dia, ca ja l’uocchi cuomu stiddi,

canta ppi mia na storia piddirina,

veni a diri la raggia d’Achiddi

lu figliu di Pilè, ca di ruina

fu causa e di lutti, e a middi a middi

si strascinà a lu ‘mphiernu, cuomu a china

di na hiumara, tanti picciuttuna

forti, sciacquati, eroici e…turduna.

Chisti fuoru l’eroi ca murieru,

Greci e Trujani, ca ccu gran fururi

si scannaru ‘ntre d’iddi e cummattieru

pp’addifenniri d’Elina l’anuri.

Ma quali anuri, si sinni fujeru

Elina e Pariti pigliati d’amuri?

A la facci di l’Atriti Minilau

di li mura cci facìanu “Marramau!”

Addunchi sta gran raggia siminaju

di corpi muorti tutta la chianura;

e a li cani a manciari li lassaju

e a l’aciddazzi senza sipurtura.

Accussì la dicisioni s’abbiraju

di Jovi, nni dda tinta cugnuntura

di la sciarra d’Achiddi e Gaminnuni

ca si li diettiru di santa ragiuni.

Certu ca Gaminnuni un re putenti

jera e lu capu di tutti li re.

Tutti si cci accalavanu ubbidienti,

cci davanu riala a tinghitè.

Ma Achiddi lu cchiu forti di dda genti

jera furiusu e terribili midè;

ca a taliarilu parìa un liuni

e a chiddu si lu manciava ‘ntre un muccuni.